Crop Insurance List Maharashtra: नांदेड जिल्ह्यातील शेतकऱ्यांसाठी एक आनंदाची बातमी आहे. पंतप्रधान पीक विमा योजनेअंतर्गत (Crop Insurance Scheme) जिल्ह्यातील पात्र शेतकऱ्यांच्या खात्यावर १०१ कोटी २८ लाख ८६ हजार रुपयांचा विमा परतावा जमा करण्यास सुरुवात झाली आहे. हा विमा परतावा विविध ट्रिगरअंतर्गत मंजूर झाला असून, यामुळे खरिपातील नुकसानीमुळे त्रस्त झालेल्या शेतकऱ्यांना मोठा दिलासा मिळाला आहे.
केंद्रीय कृषिमंत्र्यांच्या उपस्थितीत वितरणाला सुरुवात
केंद्रीय कृषिमंत्री शिवराजसिंह चौहान यांच्या उपस्थितीत राजस्थानमधील झूंझूनू येथून थेट वितरण पद्धतीने हा विमा शेतकऱ्यांच्या खात्यात जमा करण्यात आला. नांदेड जिल्ह्यातील अनेक शेतकऱ्यांनी मागील वर्षी, म्हणजेच २०२४ मध्ये अतिवृष्टीमुळे आणि प्रतिकूल हवामानामुळे पिकांचे मोठे नुकसान अनुभवले होते. विशेषतः ऑगस्ट-सप्टेंबर महिन्यातील पावसामुळे शेतकऱ्यांचे मोठे आर्थिक नुकसान झाले होते.
या नुकसानीची दखल घेत, जिल्हाधिकाऱ्यांनी हंगामातील प्रतिकूल परिस्थिती अंतर्गत २५ टक्के भरपाईसाठी अधिसूचना काढली होती. यानुसारच आता हा विमा परतावा शेतकऱ्यांना मिळत आहे.
नांदेड जिल्ह्यात एकूण ४०१ कोटींचा विमा मंजूर
जिल्हा अधीक्षक कृषी अधिकारी दत्तकुमार कळसाईत यांनी दिलेल्या माहितीनुसार, नांदेड जिल्ह्यात यापूर्वीच मध्य हंगामातील प्रतिकूल परिस्थिती घटकाअंतर्गत २५८.२९ कोटी रुपये मंजूर करण्यात आले होते. त्यापैकी २५४ कोटी रुपयांचे वितरण याआधीच झाले आहे. आता १०१ कोटी रुपयांचा परतावा जमा झाल्याने, नांदेड जिल्ह्यात मंजूर झालेल्या एकूण ४०१ कोटी १९ लाख रुपयांच्या विमा परताव्यापैकी बहुतांश रक्कम शेतकऱ्यांना मिळाली आहे.
हा विमा परतावा शेतकऱ्यांना त्यांच्या नुकसानीतून सावरण्यास मदत करेल आणि पुढील हंगामाच्या तयारीसाठी त्यांना पाठबळ देईल.
