देशातील सर्वात मोठी सार्वजनिक बँक असलेल्या स्टेट बँक ऑफ इंडियाने (SBI) आपल्या ग्राहकांना एक धक्का दिला आहे. येत्या १५ ऑगस्ट, २०२५ पासून आता ऑनलाइन IMPS (इंस्टंट मनी पेमेंट सर्व्हिस) व्यवहारांवर शुल्क आकारले जाणार आहे. आतापर्यंत पूर्णपणे मोफत असलेली ही सेवा ठराविक मर्यादेनंतर सशुल्क होणार आहे.
ऑनलाइन IMPS व्यवहारांवरील नवे शुल्क
IMPS ही एक अशी सुविधा आहे, ज्यामुळे तुम्ही इंटरनेट बँकिंग, मोबाईल बँकिंग किंवा UPI द्वारे २४x७ आणि ३६५ दिवस त्वरित पैसे पाठवू शकता. SBI ने या ऑनलाइन व्यवहारांसाठी खालीलप्रमाणे नवीन शुल्क रचना जाहीर केली आहे:
- ₹ २५,००० पर्यंत: कोणतेही शुल्क नाही.
- ₹ २५,००१ ते ₹ १ लाख: ₹ २ + GST
- ₹ १ लाख ते ₹ २ लाख: ₹ ६ + GST
- ₹ २ लाख ते ₹ ५ लाख: ₹ १० + GST
यापूर्वी, या सर्व ऑनलाइन व्यवहारांसाठी कोणतेही शुल्क नव्हते. त्यामुळे, ठराविक रकमेपेक्षा जास्त पैसे पाठवणाऱ्या ग्राहकांना आता हे अतिरिक्त शुल्क भरावे लागणार आहे.
या ग्राहकांना मिळणार दिलासा
या नियमांमध्ये काही खास खात्यांना सूट देण्यात आली आहे. ज्या ग्राहकांचे विशेष पगार खाते आहे, जसे की सरकारी किंवा खासगी कंपन्यांमधील कर्मचारी, त्यांना या शुल्कातून सूट दिली आहे. त्यामुळे अशा खात्यांवर अजूनही IMPS व्यवहारांवर शुल्क आकारले जाणार नाही.
शाखेतून होणाऱ्या व्यवहारांचे नियम कायम
तुम्ही जर बँकेच्या शाखेत (Branch) जाऊन IMPS ट्रान्सफर करत असाल, तर त्यासाठीचे शुल्क पूर्वीप्रमाणेच लागू राहील. शाखेतील व्यवहारांसाठी शुल्क २ रुपयांपासून २० रुपयांपर्यंत + GST असू शकते.
SBI च्या या निर्णयानंतर आता इतर बँकाही अशा प्रकारचे नियम लागू करण्याची शक्यता आहे. HDFC आणि ICICI यांसारख्या खासगी बँकांसोबतच कॅनरा बँक आणि पंजाब नॅशनल बँक (PNB) मध्येही IMPS ट्रान्सफरवर शुल्क आकारले जाते, पण त्यांच्या शुल्काची रचना SBI पेक्षा थोडी वेगळी आहे.
